MFA _Afghanistan 
په رسنیو کې د خپروو شویو خبرونو له مخې، په افغانستان کې د بشري مرستو د مدیریت په باب د امریکا متحده ایالتونو د نړیوالې پراختیايي ادارې په سپارښتنه یوه چمتو شوي راپور کې ادعا شوې چې ګواکې د افغانستان اسلامي امارت بېوزلو افغانانو سره نړیوالو بشري مرستو ته د «یوې عایداتي سرچینې» په سترګه ګوري.
دغه ادعا له ځمکنیو واقعیتونو سره په ټکر کې ده او په کلکه یې ردوو.
د افغانستان اسلامي امارت د یوه مسؤول حکومت په توګه نه یوازې دا چې نړیوالو بشري مرستو ته لازمې اسانتیاوې چمتو کړي، بلکې افغان حکومت په خپله هم د ټولو یواړخیزو او غیرقانوني بندیزونو سره سره له خپلو کورنیو عوایدو څخه هر کال د خپلو سوونه زره اړمنو هېوادوالو لاسنیوی کړی دی.
اسلامي امارت هره میاشت تر ۳۵۰زرو یتیمانو، تر ١٩٠ زرو معلولینو، تر ٨٠ زرو کونډو او لسګونو زرو پخوانیو سوالګرو ته هره میاشت کفاله ورکوي. پر دې سربېره ٨٠ زره د مخدره توکو معتادین په پړاویز ډول تر درملنې لاندې دي. دغو بېلګو ته په پام سره چې اسلامي امارت په خپله بودیجه کې بشري مرستو ته پاموړ برخه ځانګړې کړې ده، غیر واقعي برېښي چې بیا دې له نړیوالو بشري مرستو څخه ګټه پورته کړي.
په دې راپور کې هڅه شوې چې د ملګرو ملتونو د مرستندویه ټولنو د بدنامولو په موخه تورونه ولګوي، او متحده ایالتونه په افغانستان کې د شته بشري ناخوالو د یوه مسؤول لوري په توګه له خپلو نړیوالو مکلفیتونو ځان خلاص او خپلې کړنې توجیه کړي.
اسلامي امارت د دغه ډول افواهاتو خپرولو پرځای مثبت تعامل د دواړو لوریو په ګټه بولي او د فشار د نورو ابزارو له لاسه ورکولو وروسته اوس بشري مرستې د فشار د ابزار په توګه کارول پخپله بشرضد کړنه بولي.