وزارت امور خارجهٔ امارت اسلامی افغانستان به‌خاطر رویداد ناگوار کشته‌شدن سه تبعهٔ کشور چین در منطقهٔ شمس‌الدین شاهین ولایت ختلان جمهوری تاجیکستان، مراتب تسلیت و همدردی عمیق خود را به جمهوری خلق چین و جمهوری تاجیکستان ابراز می‌دارد و این رویداد را با شدیدترین الفاظ محکوم می‌کند.
بر اساس ارزیابی اولیه و اطلاعات به‌دست‌آمده از سوی نهادهای مربوطهٔ امارت اسلامی افغانستان، در این رویداد دست حلقاتی در کار است که برای ایجاد آشوب، بی‌ثباتی و دامن زدن به بی‌اعتمادی میان کشورهای منطقه تلاش می‌کنند.حکومت افغانستان به حکومت تاجیکستان از همکاری همه‌جانبه درین زمینه اطمینان کامل می‌دهد و جهت شناسایی عوامل این رویداد، آمادگی کامل برای تبادل اطلاعات، همکاری تخنیکی و ارزیابی مشترک دارد.امارت اسلامی افغانستان بار دیگر ضمن ابراز همدردی با خانواده‌های قربانیان این رویداد، تسلیت صادقانه خود را به آنان ابراز می‌کند.
