آقای یوی شیایونگ، نمایندهٔ ویژهٔ چین برای افغانستان و آقای محمد صادق، نمایندهٔ ویژهٔ پاکستان برای افغانستان و هیأت همراه‌شان با مولوی امیرخان متقی وزیر امور خارجهٔ ا.ا.ا. ملاقات نمودند.
درین نشست در مورد پیگیری موضوعات پنجمین نشست دیالوگ وزرای خارجهٔ افغانستان – چین – پاکستان و نشست آیندهٔ ششم آن، پنجمین نشست وزرای خارجهٔ کشورهای همسایهٔ افغانستان و همکاری‌های سیاسی و اقتصادی بحث صورت گرفت.
وزیر امور خارجهٔ کشور روابط سیاسی و اقتصادی این دو کشور با افغانستان را مهم خواند و ابراز امیدواری کرد که در آینده نیز در این بخش‌ها پیشرفت‌هایی خوب صورت گیرد.
نمایندگان ویژهٔ چین و پاکستان وعدهٔ پیشرفت بیشتر در روابط با افغانستان بر اساس حسن همجواری و احترام متقابل سپردند.
در نتیجهٔ بحث‌ها، طرف‌ها همچنان توافق کردند که ششمین نشست دیالوگ سه‌جانبهٔ وزرای خارجه در کابل برگزار شود و برای نشست آیندهٔ وزرای خارجهٔ کشورهای همسایهٔ افغانستان نیز آمادگی اتخاذ گردد.
