د افغانستان اسلامي امارت د بیرغ او نښان قانون د ۱۴۲۲هـ ق کال د محرم میاشتې د یوولسمې نېټې د دریمې ګڼې فرمان په وسیله د عالیقدر مرحوم امیرالمؤمنین ملا محمد عمر مجاهد رحمه الله تعالی له لوري توشیح شوی او د ۱۴۲۲هـ ق کال د صفرالمظفر میاشتې د اتمې نېټې په ۷۹۷ ګڼه رسمي جریده کې خپور شوی دی. یاد قانون د افغانستان اسلامي امارت د بیرغ او نښان بڼه، ځانګړنې، او د استعمال موارد تنظیموي او په دې اړه رسمي حقوقي چوکاټ ټاکي.
د افغانستان اسلامي امارت بیرغ د سپین رنګ او مستطیل شکل لرونکی دی، اوږدوالی (طول) یې د هغه د لنډوالي (عرض) یو نیم برابر دی؛ او د هغه د متن په منځ کې طیبه کلمه په تور رنګ ځای لري او په غټ ثلث خط لیکل شوې ده. د بیرغ د اندارې لنډوالی (عرض) ۱۲۵ سانتي متره او اوږدوالی (طول) یې د عرض یو نیم برابر تثبیت شوی دی.
د افغانستان اسلامي امارت نښان د راختلو په حال کې د لمر تصویر او د هغه لاندې د رېل په سر پرانیستل شوی د سپینې صفحې لرونکی عظیم الشان قرآن او د هغه لاندې په سپین متن کې محراب او منبر په سپین رنګو فیتو ښکلي کړل شوي، د غنمو د وږو په دوو غنچو محاط دی، او تر هغو لاندې د ۱۵/۱/۱۴۱۵هـ ق نېټه، تر هغه لاندې د افغانستان اسلامي امارت جمله لیکل شوې ده، د هغې په لاندینۍ برخه کې د وږو او فیتو د موښلېدو (اتصال) په برخه کې په سپین رنګ پنځه غاښه لرونکې ګرارۍ ځای لري. د نښان محیط له لاندې څخه پورته په دوو نیم-دایروي کرچونو محاط دی.
