د افغانستان اسلامي امارت د بهرنيو چارو وزير محترم مولوي امير خان متقي سره د افغانستان لپاره د متحده عربي اماراتو ځانگړي استازي سيف محمد الکتبي وکتل.
په دې ناسته کې د دواړو هېوادونو پر دوو اړخيزو اړيکو، دوې اړخيزې سوداگرۍ، دویزو پر اسانتیا، د ټرانزيټ ودې او سيمهييزو چارو خبرې وشوې.
د هېواد د بهرنيو چارو وزير متحده عربي اماراتو سره د افغانستان اسلامي امارت اړيکې مثبتې وبللې او هيله يې څرگنده کړه چې اماراتو ته د وروستي سفر پرمهال د شوو هوکړو له پلي کېدو سره به د دواړو هېوادونو سوداگريزې او ټرانزيټي اړيکې لا وده وکړي.
ښاغلي سيف محمد الکتبي پر خپل وار د دواړو هېوادونو اړيکې مهمې وبللې او زياته يې کړه چې کابل ته يې د سفر موخه د دواړو هېوادونو د بهرنيو چارو وزيرانو ترمنځ د وروستيو هوکړو تعقيب دی.
