موږ د ملګرو ملتونو امنیت شورا ته د سرمنشي خاص استازې لخوا د اعلامیې د ځینو برخو هرکلی کوو چې په افغانستان کې مثبت بدلونونه باندې اعتراف کړی لکه په نشه یي توکو اغیزمن بندیز، لوی اقتصادي ثبات، فساد نه شتون، په ځینو برخو کي د نجونو زده کړو ته لاسرسی، په منظمه توګه د عوایدو راټولول، د معاشونو ورکول، په امنیت کې د پام وړ ښه والی او د داعش پر وړاندې کوټلي هڅې. د سرمنشي خاص استازې څرکندونو کې هڅه شوې چې د افغانستان پیچلي ځمکني واقعیتونه منعکس کړي، چې دا د بندیزونو د کمیټې د څارنې ټیم او د بشري حقونو ځانګړي راپور ورکوونکي وروستي راپور برعکس وو، کوم چې له غلطیو ډک او د ځینو لوبغاړو سیاسي اجنډا منعکس کولو لپاره تیار شوي وو.
موږ په اعلامیي کې د افغانستان په هکله یاد شوي پیچلتیاوو څخه نوټ اخلو، او دا خبره تکراروو چې د افغانستان اسلامي امارت هغو نړیوالو نورمونو او مکلفیتونو ته ژمن دی چې د اسلامي شریعت له اصولو او د افغانستان له کلتوري معیارونو سره په ټکر کې نه وي او یا زموږ ملي ګټې زیانمنې نه کړي. له همدې امله موږ له ټولو هیوادونو غواړو چې د نه مداخلې نه بدلیدونکي اصل ته ژمن پاته شي او زموږ په کورنیو چارو کې د لاسوهنې ټولې هڅې، په شمول زموږ د حکومتدارۍ او قوانینو جوړښت او څرنګوالی، بندې کړي.
په پای کې موږ ټینګار کوو چې افغانستان د امنیت د تامین، د سرحدونو خوندي کول، د ګواښونو د رامنځته کیدو مخنیوی، عدالت ته د لاسرسي، د قاچاق پر وړاندې مبارزه او د نشه یي توکو له منځه وړلو په ګډون خپل نړیوال مسوولیتونو ته ژمن دی. اوس باید نړیواله ټولنه هم خپل مسوولیتونه، لکه د نه لاسوهنې بنسټیز اصل رعایت، زموږ ملي امنیت ته د نورو اړخونو له خوا ګواښ مخنیوي او د قاچاق او نشه یي توکو له ټولو ډولونو سره مبارزه، او زموږ په داخلي چارو کي نه لاس وهني ژمنتیا تر سره کړي.
