په سر کې د بهرنیو چارو وزیر د لومړي وزیر مرستیال او د سوداګرۍ وزیر ته هرکلی ووایه او له افغانستان سره د سوداګرۍ او بشري مرستو په برخو کې له مرستو مننه وکړه.
متقي صاحب وویل، د دې ترڅنګ چې قزاقستان د تجارت او ټرانزیټ په برخه کې له افغانستان څخه ګټه پورته کولای شي،په افغانستان کې هم د پانګونې ښه فرصتونه رامنځ ته شوي چې د قزاقستان سوداګر په کې پانګونه کولای شي.
د بهرنیو چارو وزیر له دې خوښي څرګنده کړه چې په تېر یوه کال کې د افغانستان او قزاقستان ترمنځ د سوداګرۍ کچې زیاتوالی موندلی او تر ۹۰۰ میلیونه ډالرو رسېدلې ده.د دوې اړخیزې سوداګرۍ د ودې په موخه، متقي صاحب له ښاغلي سریک ژومانګارین څخه وغوښتل چې افغان سوداګرو ته د ویزو د ورکړې بهیر کې لازمې اسانتیاوې راولي.
د قزاقستان د لومړي وزیر مرستیال او د سوداګرۍ او همګرایۍ وزیر وویل، چې افغانستان سره یې د هېواد اړیکې ډېرې پخوانۍ دي او په سختو وختونو کې يې هم حکومت په کابل کې خپل سفارت ونه تاړه.
ښاغلي سریک ژومانګارین وویل، چې ځان سره یې کابل ته د قزاقستان د سوداګرو یو ګروپ راوړی تر څو د دواړو هېوادونو ترمنځ سوداګریزې اړیکې لا پراخې شي. ده همدارنګه وویل، چې پخوا یې هم افغانستان سره بشري مرستې کړې دي او په راتلونکي کې به هم ادامه ورکړي.
د قزاقستان د لومړي وزیر مرستیال وویل، چې افغانستان په سیمه کې د ټرانزیټ له اړخه ځانګړی موقعیت لري چې د منځنۍ او سویلي اسیا ترمنځ د وصل نقطه ده او هېواد یې هڅه کوي چې افغانستان د رېل پټلۍ له لارې له سیمې سره وصل شي او افغانستان ته نوې سوداګريزې لارې خلاصې شي. ده وویل، دمګړۍ د قزاقستان شرکتونه د رېل پټلۍ په برخه کې له افغانستان سره ګډ کار کوي.
ښاغلي سریک ژومانګارین وویل، چې د قزاقستان د تجارت د وزیر په توګه یې ټول پام سیمې ته دی او زیاته یې کړه چې د افغانستان د ټرانزیټ پوټنسیال لوړول د دواړو لوریو مشترکه اړتیا ده.ده همداراز ژمنه وکړه، چې د افغانستان د سوداګرۍ او بهرنیو چارو وزارتونو په همکارۍ به افغان سوداګرو ته د ویزه ورکړې بهیر کې اسانتیاوې راولي.په پای کې د بهرنیو چارو وزیر یادونه وکړه، چې د افغانستان د حکومت بهرنی سیاست متوازن او اقتصادمحوره دی او د افغانستان له لارې سیمهییز ټرانزیټ او اتصال د افغانستان د بهرني سیاست په لومړیتوبونو کې ځای لري
[en_hijri_date]
