په ترمذ کې د “سولې، دوستۍ او سوکالۍ” کنفرانس ته
د ا.ا.ا. د بهرنیو چارو وزارت مالي او اداري مرستیال وینا
ترمذ – ازبکستان
19 ـ 22 می/ 2025
بسمالله الرحمن الرحیم
د ازبکستان جمهوریت د بهرنیو چارو وزارت سیاسی مرستیال، محترم بهرام جان آلویف؛
د ازبکستان د ولسمشر په مشرۍ د ستراتیژیکو او سیمهییزو مطالعاتو د انسټیټیوټ رییس محترم ایلدار اریپوف؛
د مرکزي او جنوبي آسیا هېوادونو لوړ پوړو استازو،
د نړیوالو سازمانونو او اقتصادي ادارو استازو،
السلام علیکم و رحمة الله و برکاته!
دا د ویاړ ځای دي، چې نن په دې مهمه او ارزښتناکه غونډه کې د افغانستان د خلکو او اسلامي امارت په استازیتوب ګډون کوم. اجازه راکړئ، چې لومړی د دوست، ورور او ګاونډي هېواد، ازبکستان له جمهوریت څخه د “سولې، دوستۍ او سوکالۍ د ګډې فضا رامنځته کول” تر سرلیک لاندې د دې سیمهییز ډیالوګ د رغنده نوښت او پام وړ کوربه توب څخه صادقانه مننه او قدرداني وکړم.
نن مونږ په داسې سیمه کې ژوند کوو چې د ننګونو سره سره، پکې د همکارۍ، اتصال او اقتصادي سوکالۍ لپاره پرا امکانات رامنځته شوي. افغانستان، د آسیا زړه او د مرکزي او جنوبي آسیا ترمنځ د طبیعي پل په توګه، تل هڅه کړې چې په سیمهییزو
او نړیوالو بهیرونو کې فعال او مثبت رول ولوبوي. مونږ باور لرو چې سیمهییزه همکاري به نه یوازې زمونږ ملتونو ته، بلکې نړیوالې سولې او ثبات ته هم ګټه ورسوي.
په دې وروستیو کلونو کې، د افغانستان اسلامي امارت او د ازبکستان جمهوریت ترمنځ اړیکې په مختلفو برخو کې د پام وړ او بېساري پراختیا شاهدې دي. د تاریخي، کلتوري او جغرافیایي مشترکاتو څخه په ګټې اخیستنې سره، دواړو هېوادونو د زیربناوو، انرژۍ، ټرانزیټ او کرنې په برخو کې ګڼشمېر ګډې پروژې پلي کړې دي. د دې پروژو په منځ کې د افغان – ټرانس رېل پټلۍ جوړول هم شامل دي، کوم چې د مرکزي آسیا او سویلي آسیا په نښلون کې مهم رول لوبوي. همدارنګه، د سرخاندریا ولایت څخه پلخمري ته د ۵۰۰ کیلوولټه برېښنا لېږد پروژه به په افغانستان کې انرژۍ ته د لاسرسي ظرفیت د پام وړ لوړ کړي.
د کرنې په برخه کې، دواړو هېوادونو د عصري ټیکنالوژیو په کارولو سره د کرنیزو محصولاتو د ګډ کښت لپاره پلانونه پیل کړي دي. سربېره پردې، د دواړو هېوادونو ترمنځ د انرژۍ، کرنې او صنعتي برخو کې د ۲.۵ ملیاردو ډالرو په ارزښت تړونونه لاسلیک شوي دي. دا همکارۍ د افغانستان اسلامي امارت او د ازبکستان جمهوریت د دوامداره پرمختګ، د سیمهییز ثبات پیاوړتیا او د دواړو هېوادونو د خلکو د هوساینې لپاره د ګډو ظرفیتونو څخه د ګټې اخیستنې په اړه د ګډې ژمنې ښکارندویي کوي.
د افغانستان اسلامي امارت بهرنۍ پالیسي متوازنه او په اقتصادي اصولو، سیمهییزې همکارۍ او متقابل درناوي ولاړه ده. مونږ ټینګار کوو چې د افغانستان خاوره به د هيڅ بل هېواد پر ضد ونه کارول شي او له نورو څخه هم ورته تمه لرو. مونږ غواړو چې افغانستان د اتصال، سوداګرۍ، ټرانزیټ او کلتوري همکارۍ لپاره د یو داسې پلیټفارم په توګه وکارول شي چې ټولو ته ګټه ورسوي.
د افغانستان اسلامي امارت چمتو دی چې په ټولو سیمهییزو نوښتونو؛ په شمول د زېربنایي پروژو، ټرانسپورټ، انرژۍ لېږد، سوداګرۍ، تعلیم، اقلیمي بدلون، او دوامداره پراختیا کې فعاله ونډه واخلي. مونږ په ټوله سیمه کې د متوازن پرمختګ غوښتنه کوو او په دې باور یو، چې خبرېاترې، تفاهم او باور جوړونه د هر ګډ پرمختګ اساس دی.
مونږ په نړیواله ټولنه، سیمهییزو هېوادونو، نړیوالو سازمانونو او مالي ادارو غږ کوو چې افغانستان ته د یو باوري ملګري په توګه وګوري او د دوامداره پراختیا، زیربنایي پانګونې، ظرفیت لوړونې، د افغانانو اقتصادي هوساینې او ودې لپاره په اغیزمنه توګه همکاري وکړي.
د افغانستان اسلامي امارت له دې غونډې څخه چې د ملګرو ملتونو د عمومي اسامبلې د پرېکړې په رڼا کې د مرکزي او جنوبي آسیا ترمنځ د اړیکو د پیاوړتیا په اړه ترسره کېږي، کلک ملاتړ کوي. مونږ دا غونډه د هېوادونو ترمنځ د نظرونو د تبادلې، متقابلې پېژندنې او د عملي همکاریو د رامنځته کولو لپاره یو مهم فرصت ګڼو.
په پای کې، غواړم یو ځل بیا د ازبکستان له جمهوریت څخه د دې ارزښتناکې غونډې د تنظیمولو له امله مننه وکړم، او هیله مند یو، چې د دې خبرو اترو پایلې به د سیمې هېوادونو او د هغوی د ملتونو لپاره د غوره او روښانه راتلونکي لاره هواره کړي.
په درنښت
