په دې لیدنه کې دواړو لوریو د دوه اړخیزو اړیکو پر پراختیا، اقتصادي همکاریو، سیمهییزو فرصتونو، ترانزیټي پروژو او د سیاسي تفاهم پر زیاتوالي هر اړخیز بحث وکړ.
د هیواد د بهرنیو چارو وزیر د افغانستان اړوند د قزاقستان جمهوریت له مثبت دریځ قدرداني وکړه او هیله یې څرګنده کړه چې د سیاسي او اقتصادي تعامل د لا پراختیا په خاطر له رامنځ ته شوو فرصتونو مثبته استفاده وشي. هغه یاده کړه چې قزاقستان له هغو هېوادونو څخه دی چې له پیل راهیسې یې د افغانستان اړوند رغنده دریځ غوره کړی، او اوس وخت رارسېدلی چې دا مثبت تعامل په پیاوړو او دوامدارو اوږد مهالو همکاریو بدل شي، تر څو د دواړو هېوادونو ترمنځ باور او شراکت لا پراخه شي. ښاغلي مرات نورتلیو افغانستان ته په لومړي ځل راتګ له امنیت څخه د اطمینان څرګندولو ترڅنګ وویل .
چې اراده لري له افغانستان سره سیاسي اړیکو ، اقتصادي او علمي همکاریو ته توسعه ورکړي. هغه په ټینګار سره وویل چې قزاقستان غواړي په اوږد مهال کې د افغانستان په ثبات، ترانزټ د خوړو امنیت او په ټوله کي په هر اړخیز پرمختګ کې مثبت رول ولوبوي.
مجلس په پای کې دواړو خواوو د تورغونډي – هرات د اوسپنۍ پټلۍ په برخه کې په لاسلیک شوې تفاهمنامې خوښي څرګنده کړه او د تخنیکي ټیمونو ترمنځ د دوامداره ګډ کار پر دوام یې هوکړه وکړه
