د هند جمهوریت بهرنیو چارو وزارت خاص استازي او د افغانستان، ایران او پاکستان د څانګې عمومي رئیس آنند پرکاش د افغانستان اسلامي امارت بهرنیو چارو وزیر مولوي امیرخان متقي سره وکتل.
په دې ناسته کې د دواړو هیوادونو تر منځ پر دوه اړخیزو سیاسي اړیکو، سوداګرۍ، ټرانزیټ او وروستیو سیمهییزو سیاسي حالاتو په تړاو خبرې وشوې.
د بهرنیو چارو وزیر د دواړو هیوادونو تر منځ د ديپلوماتیکو او اقتصادي اړیکو پر پراختیا ټینګار وکړ او څرګنده یې کړه چې افغانستان کې اوسمهال د پانګونې لپاره ښه فرصتونه برابر دي او هندي پانګوال دې له دغه فرصتونو څخه په استفادې په افغانستان کې پانګونه وکړي.
د بهرنیو چارو وزیر همدا راز وویل: چې د افغانستان او هند تر منځ د خلکو تګ راتګ په برخه کې باید اسانتیاوې رامنځته شي او د سوداګرو په شمول دې ناروغانو او محصلینو ته د ویزو ورکړه عادي حالت ته راوګرځول شي.
ښاغلي آنند پرکاش وویل: چې هېواد ته یې له افغانستان سره اړیکې مهمې دي او هیله مند دی چې په مختلفو برخو کې اړیکې نورې هم پراخې کړي.
نوموړي وویل چې هند به له افغانستان سره خپلو همکاریو ته دوام ورکوي او غواړي چې په ځینو زیربنايي پروژو کې هم پانګونه وکړي او هغه پروژې چې د څه مودې راهیسې ولاړې دي، چارې يي بېرته پیل کړي.
په پای کې دواړو لوریو د اړیکو پر پراختیا د پلاوو پر تګ راتګ او د ویزو په برخه کې په اسانتیاوو راوستلو او دوه اړخیزو همکاریو ټینګار وکړ.
